Egypt's Disappeared

التعديل قادم بلا هواده.. انتوا نور عنينا

صحينا من النوم النهارده على فيلم جديد من افلام المجلس العسكري ,, من انتاج و اخراج عبدالفتاح السيسي.. الفيلم اسمه "يللا بينا نعدل الستور" طبعا و البطل الاوحد و المبجل هوه عبد الفتاح السيسي والبرلمان المصري المرتعش.

مش كفايه الفضيحه بتاعت قناه سي بي اس CBS الاخباريه الامريكيه وان الرئاسه كانت عايزه الاسئله قبل اللقاء.. كمان بنجهز للفضيحه في اللقاء القادم بتعديل دستور لم يمضي عليه عشر سنوات؟؟؟؟

هل يعقل ان الناس... تطلع تأييده لما شال الاخوان بقياده جدو المرشد و محمد مرسي الكومبارس.. وتنتخبه بنسبه %97 ويطلع الدستور... والسيسي يباركه ...و يبوس اللي عملوه من الخد ده و الخد ده... و بعد كده يطلع قرارات متناقضه مع مواد الدستور اللي هوه وافق عليه و لبسه للشعب المصري نفر نفر ؟؟؟؟ و يقول لهم ايه "انتوا نور عنينا"

الماده 236 من الدستور المصري لسنه 2014 قالت ان الاقليات من حقها العوده واللي من ضمنها حق عوده النوبيين الى اراضيهم على ضفاف بحيره ناصر... او حتى قريب منها وذلك كتعويض عن التضحيات اللي عملوها علشان السد العالي و بحيره ناصر اللي غرقت اراضيهم... و التهجير القصري من اراضيهم  في جنوب السد العالي، الى المناطق الصحراويه شمال مدينه اسوان اللي ما كانش فيها لا مياه شرب و لا كهرباء و لا صرف صحي.. ولا مستشفى او حتى مدرسه... عاشوا هناك في الصحراء بعيدا عن النيل و الحياه البسيطه... و السيسي طلع القرار رقم 444 المناقض للماده 236 بتحويل اراضيهم حول بحيره ناصر  اللي المفروض يرجعوا ليها الى منطقه عسكريه محظور التواجد فيها لاي فرد مدني؟؟ طبعا قالك طز في النوبيين و لو مش عاجبهم يروحوا السودان يعيشوا عند البشير قريبهم؟؟؟ لا يا سيدي احنا مش رايحين في حته و هنرجع اراضينا بالقانون يا سيسي... طبعا كون اني نوبي من اب و ام نوبيين.. فانا من حقي اني اقول ان احنا تركنا ارضنا و قرانا ومدن الجمهوريه العربيه المصريه لاننا زهقنا من الحكام المصريين واللي اغلبهم من محافظه المنوفيه.. و سافرنا في بلاد الله الواسعه لان الحزن و الالم ليس لهم علاج في مصر.

المضحك بقه هو المسرحيه اللي شغال عليها السيسي و المجلس العسكري و شله النواب المرتعشين في مجلس الشعب المصري اللي ما حدش عارف عنهم حاجه.. مسرحيه تعديل و تنقيح الدستور من اجل صناعه فرعون جديد... واي حيوان يغرد خارج السرب او حمار ينهق خارج الحظيره ... هيتعمل له فضيحه و ناس تشهد عليه.. طبعا اخرهم كان عضو مجلس الشعب المخرج/ خالد يوسف مع الفنانات الصاعدات واللي التحقيق يجري معاهم حاليا لحين تغيير العضو المعترض على تعديل الدستور لما يتوافق مع الصالح العام... ماذا والا فالفضيحه سوف تلاحقه الى يوم الدين.

مش فاضل غير اننا نجيب السيده الفاضله/ صفاء ابو السعود تألفله اغنيه على غرار اغاني تأييد تمديد فتره رئاسه حسني مبارك،، ايام حكمه... فاكرينها؟؟؟ (اخترناه و بايعناه و احنا معاه لمشاء الله)... مش كفايه مبارك و اللي عمله في البلد بسبب نفس المشروع الفاشل لتعديل و اضافه و حذف من الدستور المصري، و اللي سبب كل الخراب اللي البلد فيه من ثوره و انقلاب عسكري و ضياع اقتصاد و تعويم سعر صرف الجنيه المصري و اعدامات بالجمله و اعتقالات و اختفاءات قسريه لافراد الشعب واللي كان من الممكن اكون واحد منهم... والتهم المتفصله كثيره و جاهزه على الرف... انت بس هات لنا اي حد عايز تلبسه تهمه و احنا نلبسها له في دقايق و بشهود ووقائع يا باشا.

اللي غايظني ان المروجيين للمشروع شغالين على اغنيه ان الراجل "السيسي" محتاج وقت اطول من الفترتين الرئاسيتين علشان ينفذ الخطط اللي رسمها للبلد... ده على اساس ان البلد مافيهاش حد بيفهم.. ولا حتى المجلس العسكري!!!! ده احنا امام اينشتاين الالفيه في صوره الرئيس السيسي...

في البلاد المحترمه بيتعمل حاجه اسمها الخطه الرئيسيه لتنميه الوطن "ماستر بلان" او "Master Plan"  بيتوافق عليها من ناس بتفهم اقتصاد و قانون و صناعه و زراعه وفي الاخر مجلس الشعب و الرئيس ان كان في نظام جمهوري او وزاري ..و بيمشي عليها الحاكم الحالي و اللي بعده واللي بعد اللي بعده الى ان تحقق اهدافها. مش بتمديد فتره الرئاسه للسيسي علشان يحقق امانيه والتي تتلخص في بناء سور مسلح حول الحي الدبلوماسي في العاصمه الاداريه واللي هيعيش فيها هوه و اعضاء المجلس العسكري و كبار قاده الجيش ،،محصنين من ثوره الجياع،،، و يقطع المياه و الكهرباء عن العاصمه القديمه... واللي مش عاجبه يدفع.

 طبعا الخطه دي مش زي الخطط الخمسيه بتاعت مبارك و اعوانه اللي جابوا لنا السرطان و باعوا القطاع العام بالقيم الدفتريه ومن بعدهم الاخوان اللي باعوا اراضي الوطن للمغتربين بالدولار وحاول الاخوان يكملوا النصبه بمشروع طائر النهضه.. الطائر اللذي يلد و لا يبيض...طبعا السيسي و المجلس العسكري ما كانش عاجبهم الوضع ده فراحوا سايبين كل المشاريع و مشروع ارض الوطن يضرب يقلب و الناس قاعده تصوت على الدولارات اللي اندفعت غي اراضي مشروع ارض الوطن اللي ما دخلتلهوش مرافق لغايه النهارده!!!! في حين العاصمه الجديده و جامع "الفتاح العليم" منور و الكهرباء و المياه واصله هناك وماحدش بيشتكي... البس يا شعب مصر

طبعا الدستور هيتقيف و يتعدل حسب ما السيسي و المجلس العسكري عايز.. وان شاء الله كمان خمسين سنه هنفتكر اننا سكتنا على المصيبه دي علشان عايزين نربي عيالنا. والحكومه و الجيش ماضيين في سياسه الهاء الشعب المصري بالجري وراء لقمه العيش ..و موضوع فستان رانيا و افلام محمد رمضان والمسلسل التركي والهندي المدبلج. و في يوم و ليله يلاقوا الدستور متأييد بنسبة %120

انا طبعا عندي اقتراح اننا نغير نظام الحكم النظام جديد اسمه...النظام الملكي العسكري... علشان كل واحد يحط الصرمه في فمه و نعيش عبيد الى ان يقضي الله امرا كان مفعولا..

انا مش راجع البلد دي تاني لان ماليش فيها وطن بهذا الشكل.. سلام عليكم

نقاء دم

النهارده هنتكلم عن نقاء الدم النوبي !!! هتسالني معناها ايه الجمله دي؟؟؟

هقولك يا عسل و سكر ان النوبه اللي الناس بيبوصوا لها على انها بلد الناس المهمشه، هي عبارة عن عرقين من البشر، عرق يسمى الكنوز ، وعرق يسمى الفدكات.

المهم ان العرقين دول مع انهم اصل بلاد النوبه اللي كان منشأها السودان في اسم مختلف للعرقين (الكنوز = الدناقله) و (الفدكات = المحس). العرقين مختلفين في الطباع والتقاليد واللغه النوبيه التي تنطق ولا تكتب في العرقين.

والغريب انهم كمان ما بتجوزوش من بعض على مدى السنين والقرون اللي فاتت في تاريخ النوبه نظرا للاختلافات اللي قلت لكم عليها واهمها اللغة. ده غير ان المفهوم الادمي للانسان مختلف شويه عند العرقين بس كلهم متفقين على ان النوبي نوبي ،، وغير النوبي بيسموه "فلااااااح"

من كام سنه كده بدأت التقاربات بين العرقين تزيد من ناحية النسب نظرا للتعليم والهجره خارج بلاد النوبه ان كانت هجره داخليه داخل القطر المصري او خارجيه في اي بلد عربي او غير عربي ،،، زي حلاتي كده متغرب من صغري والله،،، المهم اننا بدأنا نتعامل في محيط الاصدقاء المحيطين والمشتركين بيننا الا اني بحس لغاية النهارده بعدم الامان في هذه العلاقه المشوبه بالقلق من بكره!!! انا من الفدكات على فكره

المشكله بقه لما يكون واحد متجوز من نفس العرق ويجي اخوه او اخته تتجوز من عرق تاني، في نشأ هيطلع للعالم ده وهو حاسس بعدم الانتماء ،، سواء للعائله او اولاد العم والعمه والخال والخاله،،،.. وطبعا الاب والام علشان الحساسيات وخصوصا لو عايشين خارج النوبه، هيتحاشوا انهم يتكلموا في الموضوع ده مع الاولاد وحتى لو كبروا !!!! ده كمان اللغة النوبيه سواء في العرق الفدكات او الكنوز هيكون مصيرها الاندثااار... على فكره انا ما بتكلمش لغة اهل النوبه لاني اتربيت بره النوبه... تايواني يعني... هههها ايوه دي كلمه قالها لي واحد سوداني في السعوديه لما سالني ان كنت بتكلم لغة الاهل اللي بيسموها "الروطانه" 

 

الموضوع ده بحاول افهمه للناس بكل الطرق والكباري الممكنه ،، بس في واحد قال لي كلمه وانا في عز العصبيه من موضوع الزواج المختلط بين الكنوز والفدكات،،، قال لي " يابني الاب والام ما بيصدقوا يستروا بنت في الزمن اللي احنا فيه !!! المهم انه مسلم وهيراعي ربنا فيها"

ساعتها حسيت ان التنازلات بكره هتزيد و تزيد علشان نستر بناتنا في الدنيا الغريبه!!!! طيب والدم النقي اللي لما تكلم واحد وتقول له اننا قرايب وتجيب له شجرة عائله كريمه من اب وام وجد وجده كلهم تعرفهم اسما اسما وطباعهم وحركاتهم !!! النهارده ده كله هيترمي وراء الظهور،،،، هنضحي بالدم النقي علشان نستر بنت؟؟؟

انا مش بقصد اهين حد لما بقول دم نقي،، انا قصدي النسب من اب جد الجد للابوين المختلطين من كنوز و فدكات!!!!

 

كان نفسي اقدر اتجوز الف واحده ولا اني اشوف اليوم ده بالشكل ده.

التليفون السامسونج

الحياه حلوه بس السعاده ما بقتش تتقاس بحلاوة الدنيا... السعاده انك تلاقي الشريك والصديق المناسب لنمط حياتك. لما بتتجوز بتحس انك عملت كل حاجه  وبعد سنه تتمنى ان التاريخ يرجع للوراء علشان تصلح غلطات كتيره في حياتك منها عملتك المهببه يوم ما قررت تتجوز.

السعاده النهارده بعد سبع سنين جواز هيا في ضحكة ابني وبنتي... بتحس وهما مبسوطين انك انتا اللي فرحان وانك عايز تجيب لهم كل حاجه علشان يبقوا مبسوطين وسعداء.

المهم انك في وسط كل ده بتدور على شريك حياتك وتلاقيه عايش في وادي تاني والدنيا لذيذه و حلوه وربنا يخلي لنا السامسونج اللي بقه هوه كل حاجه. الواحد مش عارف يعمل ايه!!!!! ما هوه انتا ما تقدرش تهرب من كل ده بالشغل والاصحاب لانك بتشوف نفسك في صاحبك اللي حاله من حالك..!! كانك في المرايه شايف نفسك.

والاحلى ان موضوع الصديق المخلص برضه اختفى من الوجود.. عارف المثل اللي بيقول " مصلحتي بتفتح بدري " والاحلى من كده اللي يجيلك ويقولك انا اعرف عن طباعكم وعادتكم وتقاليدكم وبعد كده يجي منه اول خازوق في حجم صاروخ اسكود !!!! يرشقك في الحيط...... والاحاى من كده اللي بيستهبل ويعمل نفسه اذكى منك.. انا الناس دي بحب الاعبها على المكشوف.

مشكلتي ان عايز انزل مصر واشوف الدنيا هناك عامله ازاي.... شارعنا وحشني جداً على الرغم من اني ما بقتش اعرف حد فيه!!!! بس بحب منطقتي.

البيضة الاول وللا الفرخة !!!!

،،،،الحمد لله اني لسه عايش وماحدش اعتقلني الثورة قامت والدنيا اتغيرت واهو انتخابات مجلس الشعب اتعملت والمجلس انعقد وكان سيد قراره اللي ما اخدش ولا قرار صح او يفيد البلد والمجلس اتفض وانحل والرئيس جاي بكره وهنشوف هوه كمان ان كان موسى ولا فرعون!!!! هيضيف ياه للمجتمع المطحون.... انا ،صاحبي رجع من اجازة في مصر من اقل من شهر وبيحلف لي ان البنزين مش موجود والمحطات بالطوابير؟؟؟ وده بقه خزوق الاخوان في الحكومة ،،،، ولا الفلول في الاخوان؟؟؟ ولا الفلول في الحكومة؟؟؟ ولا الكل بيخوق في المجلس العسكري؟؟؟؟ اول مره اشوف بلد بتنتخب الريس قبل ما يكون عندهم دستور!!!! البيضه الاول ولا الفرخه ؟؟؟ بكره الساعة ٣ العصر اللجنة هتقول كلمتها في الانتخابات الرياسية؟؟؟ والله ما انا نازل اجازة الا لما البلد ترسى على حل اديها على امريكا السنه دي

Mubark game

كل عام وانتم بخير... اولا احب الفت انتباهكم يا شباب مصر ان الحكومه ماشيه في الطريق الصح في تطبيق سيايه الالهاء بمنتهى الرحرفنه.. الهي الشعب بالكوره.. الهي الشعب بالماتش...طلع عينهم من غير ما يشتكوا... وبكره يطلعوا لنا حاجه جديده علشان نفضل وراها زي العمي.

كل واحد فينا ينادي باصلاح بلدنا اللي قربت تبقى خرابه بدون حسيب ولا رقيب.. انتم مش حاسيين بيها دلوقتي بس السيناريو بتاع الخطه طويل وبطئ واحنا زي ما بيقول المثل... الشعب المصري طبله تلمه وكرباج يمشيه... وزيد عليها .. ويا سلام لو تلهيه.

انا بنصح كل شاب انه ينمي من قدراته ويبص لمستقبله بدل الجري ورا اللاعيبه والمنتخب والعربيات والموبايلات.. ده احنا من كتر المنظره اللي عايشين فيها بقينا اكتر بلد فيها موبايلات وعربيات!!!... ولسه الشعب مش لاقي ياكل ؟؟!!!!..

حد يقول لي كده لو طلعنا كاس العالم، وكسبناه يا سيدي،، هنستفيد ايه؟؟؟ الناس هتتحترمنا؟؟ وللا كل مصري في الخارج هيعلقوله نيشان؟؟

يا حبيبي انتا وهوه بص للصين اللي كانت تحت التراب ايام ما كنا احنا في عز المجد والثورة والعبور والقوميه اللعربيه،،، هما فين النهارده واحنا فين،،، هنفضل نغني على بعض،، ونبكي على ماتش كوره،،،ونهلل في سته اكتوبر ،،، وفي الاخر الشباب قاعده غلى القهوه مصطوله ومبرشمه ومش لاقيه شغل,,,الانحراف في البلد واضح,, والتحرش ببنات الناس بقه تسليه ومش معاكسه,, الناس بقه كل همها تقطع بعض علشان الموبايل الجديد والعربيه اللي بيشحت ويسرق علشان يدفع قسطها كل شهر,,,, ومافيش شغل,, والجريمه في ازدياد,,, وبعد كل ده تلاقي واحد مش بيشتغل وبيستلف فلوس من الناس علشان يروح يحضر ماتش كوره,,, والحكومه فرحانه ومسيبه كلاب الفضائيات يهللوا ويلبسوا احمر ويسبوا في الجزائر ويشتموا في الناس... علشان ماتش كوره؟؟؟؟!!!

انا بقول لكل شاب وشابه اننا لو ما حسنناش وضعنا جوه بلدنا ما فيش حد هيبص لنا لا بره بلدنا ولا جواها حتى.. ولو طلعنا القمر مش اخدنا كاس العالم. اللي عايز يفهمني يبص للصين وكوريا وماليزيا ووراهم في الدور تايلاند و فيتنام ونعمل زيهم بدل الهايصه والضحك على الدقون... وكل سنه وانتم طيبين

Eid time

Hi everyone,

today we have new post as i'm right now living in Qatar,, and we have eid holiday as state under muslims calender. i have been at home since last thursday doing nothing more than taking my kid out and sometimes i go with frinds to sealine where all kind of risks there